A Deputación destina máis de 2,3 millóns de euros a subvencións para reforzar a calidade turística en 2026
A Deputación da Coruña activou para este ano o programa (DP0030), unha liña de axudas dotada con máis de 2,3 millóns de euros para apoiar actuacións vencelladas á calidade, a competitividade, a organización de eventos e o impulso de iniciativas turísticas na provincia.
O prazo para solicitar as subvencións abre este 22 de xaneiro e pecha o 16 de febreiro. A tramitación deberá facerse por vía telemática na plataforma SUBTEL, accesíbel desde a sede electrónica da institución provincial.
A convocatoria está dirixida a entes de xestión, asociacións, mancomunidades e consorcios turísticos, e pretende favorecer a creación de produtos, mellorar a difusión e o posicionamento do territorio e avanzar na profesionalización do sector. Entre as accións subvencionábeis inclúense ámbitos como a formación, o deseño de plans e o desenvolvemento de actividades e eventos.
Segundo a información resumida da convocatoria, as axudas poderán cubrir ata o 80% do custo e acadar un máximo de 150.000 euros por proxecto (cun orzamento máximo subvencionábel de 187.500 euros).
O vicepresidente e responsábel de Turismo, Xosé Regueira, sinalou que estas achegas permitirán impulsar a promoción dos oito xeodestinos da provincia cun ‘turismo de calidade’, apostando pola colaboración público-privada e sectorial para gañar competitividade e innovación. Nesa liña, lembrou que a provincia traballa cunha rede de oito xeodestinos (Ferrolterra, As Mariñas, Costa da Morte, Terras de Santiago, Ría de Muros-Noia, Barbanza-Arousa, Terras da Comarca de Ordes e Ulla-Tambre-Mandeo).
Regueira engadiu que tamén se busca favorecer proxectos europeos ligados á economía azul para potenciar o turismo náutico sustentábel, nun litoral que, segundo destacou, suma 956 quilómetros de costa. Ademais, o programa quere seguir reforzando a gastronomía como recurso turístico, con eventos diferenciadores e produtos innovadores, atendendo á sostibilidade ambiental e á creación de emprego no rural.