A Deputación da Coruña reserva 450.000 euros para proxectos ambientais e de benestar animal en 2026
A Deputación da Coruña puxo en marcha unha nova convocatoria de subvencións dirixida a entidades sen fins de lucro da provincia para apoiar iniciativas ligadas á protección do medio ambiente e ao benestar dos animais domésticos, cun orzamento total de 450.000 euros para o exercicio 2026.
As axudas estrutúranse en dous grandes bloques: por unha banda, programas de protección e educación ambiental e, pola outra, actuacións a favor de cans e gatos abandonados. En ambos casos, o prazo de presentación de solicitudes xa está aberto e rematará o 16 de decembro, cunha tramitación que se realizará exclusivamente por vía telemática a través da sede electrónica da Deputación, mediante a plataforma Subtel.
No ámbito estritamente ambiental, a institución provincial destina 300.000 euros, dos cales 200.000 se reservarán para actividades e 100.000 para investimentos. Trátase de apoiar campañas de divulgación e sensibilización, programas de voluntariado, proxectos de recuperación de espazos naturais, iniciativas de educación ambiental e accións que favorezan a conservación da biodiversidade e dos recursos naturais na provincia. No capítulo de investimentos, as entidades poderán financiar a compra de equipamentos, material ou melloras en infraestruturas necesarias para desenvolver o seu labor ambiental.
O segundo bloque de axudas está pensado para asociacións protectoras de animais domésticos, que contarán con 150.000 euros (100.000 para actividades e 50.000 para investimentos) destinados a reforzar o seu traballo diario na recollida, atención e procura de fogar para cans e gatos abandonados. Entre as accións subvencionables figuran campañas de esterilización, programas de adopción responsable, atención veterinaria habitual ou de urxencia e actuacións para mellorar as instalacións onde se acollen estes animais.
Deputación da Coruña
As catro liñas de subvencións intégranse nas partidas de fomento provincial da área de Industria, Emprego, Política Demográfica e Medio Ambiente, baixo os programas específicos para actividades e investimentos ambientais e para coidado dos animais domésticos, recollidos nos orzamentos de 2026 da Deputación da Coruña.
A deputada de Medio Ambiente, Rosa Ana García, subliñou que estes programas son, ao seu xuízo, unha mostra clara do compromiso da Deputación coa sostibilidade e coa defensa dos animais, e destacou que o apoio ao tecido asociativo é fundamental para consolidar proxectos transformadores con impacto real na vida da veciñanza e no territorio provincial.
O prazo para presentar solicitudes mantense aberto ata o 16 de decembro ás 14.00 horas, e as entidades interesadas poden rexistrar as súas peticións dende o pasado 15 de novembro ás 9.00 horas a través da sede electrónica provincial, onde tamén están dispoñibles as bases completas de cada programa.