A Deputación da Coruña reivindica en Culturgal a cultura como dereito e chama a fortalecer o ecosistema creativo galego
A Deputación da Coruña participou este venres na inauguración de Culturgal 2025, a principal feira das industrias culturais galegas, cunha presenza destacada e un programa propio deseñado para poñer en valor o talento creativo da provincia.
A institución estivo representada pola deputada de Cultura, Natividade González, que definiu Culturgal como 'o gran escaparate da creación cultural galega, un espazo no que gozar dun programa diverso e amplo que cada ano convoca públicos moi diferentes'. Na súa intervención, puxo o acento no carácter comunitario do encontro: 'É un lugar para vivir a cultura en comunidade, para acudir en familia, para descubrir e para deixarse sorprender'.
González subliñou tamén a dimensión de rede que ofrece a feira, onde se dan cita artistas, creadoras e creadores, entidades, empresas e público: 'Culturgal é encontro e diálogo, o lugar onde medra o tecido cultural galego'.
A Deputación da Coruña acode a esta edición cun programa que abrangue literatura, banda deseñada, música, artes visuais e accións divulgativas. 'Estamos aquí para compartir proxectos, apoiar a creación e achegar ao público as iniciativas culturais que impulsamos ao longo de todo o ano', explicou a deputada.
Entre as propostas máis destacadas atópanse os certames literarios provinciais, a presentación do libro 'O Cancioneiro galego-portugués', a exposición retrospectiva '20 anos do Premio Castelao de Banda Deseñada' e as residencias artísticas de Mariñán, que amosan a diversidade e vitalidade da creación coruñesa. A isto súmanse obradoiros de banda deseñada, mesas redondas arredor do Premio Castelao, a actividade 'Ronco: disección anatómica da gaita' do colectivo INCRA, a presentación do discofilm 'A Pedreira, Basal' de Ugia Pedreira e actuacións ligadas aos premios 'Quero Cantar' de música infantil e xuvenil e 'Narf' para grupos e artistas.
Ao longo dos tres días de feira, a Deputación contará ademais cun posto propio no que o público poderá coñecer a campaña 'A cultura para unha vida mellor', o catálogo 'Unha lingua con orgullo' e a nova plataforma móbil da Rede Cultural, pensada para facilitar o acceso á programación cultural nos concellos da provincia.
Para pechar a súa intervención, Natividade González fixo un chamamento á participación cidadá e ao compromiso das institucións co tecido creativo: 'A cultura é un dereito e non un luxo, e Culturgal é unha oportunidade única para celebralo, compartilo e recoñecer o talento do noso país'.