A Deputación da Coruña promoveu en Bilbao a gastronomía provincial cos "5 sentidos"
Bilbao foi o escenario no que a provincia da Coruña despregou onte todo o seu potencial gastronómico co evento "A Coruña cos 5 sentidos", organizado pola área de turismo da Deputación da Coruña. Máis de cen asistentes profesionais acudiron ao Palacio Euskalduna para degustar os produtos locais e apreciar a cociña en directo a cargo de A Artesa da Moza Crecha. Entre o público, tamén se contou coa presenza de Sonia Pérez, deputada floral de Transportes, Mobilidade e Turismo.
O evento forma parte da campaña "A provincia que sabe", que busca promocionar a cadea agroalimentaria da Coruña, dende os pequenos produtores ata os chefs, destacando a gastronomía como eixo principal da estratexia turística do territorio. A chef Paula Martínez e o cociñeiro Lolo Mosteiro, de A Artesa da Moza Crecha (Betanzos), foron os encargados de elaborar un menú de quilómetro cero baseado en produtos autóctonos, como o mexillón do Barbanza, os percebes do Roncudo, a pataca de Coristanco e o polbo de Mugardos.
O menú complementouse con degustacións de Mariscos de Barallobre, A Despensa d'Lujo, Queixo Galmesán, Vila sen vento, Cafés Aruba, Costumes Galicia Empanadas, Bodegas Lodeiros, A Conserveira e o Museo MEGA Estrella Galicia, conseguindo conquistar os “5 sentidos” dos asistentes.
Para as empresas participantes, esta foi "unha gran oportunidade" para dar a coñecer a súa materia prima en foros profesionais de alto valor, amosando a riqueza gastronómica da provincia como o mellor embaixador turístico, segundo indicou o vicepresidente e deputado de turismo, Xosé Regueira.