A Deputación da Coruña celebra a II Gala de Turismo e distingue cinco proxectos pola súa innovación e compromiso co territorio
O Porto de Oza acolleu este mércores 27 de novembro a segunda edición da Gala de Turismo da Deputación da Coruña, unha cita que continúa gañando peso e que xa se consolida como un dos eventos de referencia para profesionais, entidades e empresas do sector turístico provincial. O encontro serviu como espazo de análise, recoñecemento e impulso para un sector estratéxico que avanza cara a un modelo máis competitivo, responsable e en sintonía coa identidade do territorio.
O presidente da Deputación, Valentín González Formoso, destacou o papel do turismo como motor económico e social, especialmente nos concellos rurais. “O turismo non é un capricho nin algo pasaxeiro, é unha aposta de futuro capaz de crear emprego, fixar poboación e dinamizar os nosos territorios”, indicou. Formoso salientou que os proxectos galardoados representan “un turismo innovador, auténtico, de calidade e comprometido coa nosa terra”, lembrando ademais que o sector supón arredor do 13% do PIB galego e mantén preto de 130.000 empregos.
O mandatario provincial puxo en valor iniciativas impulsadas pola Deputación nos últimos anos, como os Plans de Sostibilidade Turística en Destino (PSTD), cun investimento que supera os oito millóns de euros, a recuperación da Vía Verde CompostelaTambreLengüelle ou a promoción do Camiño Inglés no Reino Unido, así como proxectos como Os Fogóns do Anllóns e a campaña A paisaxe que sabe.
Pola súa banda, o vicepresidente e responsable da área de Turismo, Xosé Regueira, definiu a gala como unha oportunidade para seguir afianzando un modelo turístico que aposta por potenciar o que fai única á provincia. “O turismo funciona cando xera beneficios reais para a economía local. Apostamos pola autenticidade: polo rural, polo mar, pola nosa horta, pola nosa cultura e pola nosa lingua”, afirmou. Regueira insistiu en que o éxito do turismo coruñés pasa por “non copiar modelos alleos, senón reforzar aquilo que nos define”.
A gala incluíu a entrega de cinco premios que reflicten a diversidade e o talento do sector. O xurado, integrado por profesionais da comunicación, do ámbito académico e do sector turístico, distinguiu proxectos pola súa innovación, identidade, desenvolvemento e traxectoria.
O recoñecemento á Mellor iniciativa de innovación, calidade e sustentabilidade foi para Volta Montana, recollido por Micaela López e Cristina García Souto. Na categoría de posta en valor da autenticidade do territorio, o galardón recaeu en Chichalovers, recibido por Graciela e Darío. O premio ao Mellor proxecto emerxente distinguiu o Hotel Espazo Nature (Razo, Carballo), representado por Laura Vázquez.
No ámbito enogastronómico, A Artesa da Moza Crecha (Betanzos) foi recoñecida pola súa defensa do produto local e da cultura culinaria do Mandeo, un premio recollido por Paula Martínez e Lolo Mosteiro. Finalmente, o galardón á traxectoria (Toda unha vida dedicada ao turismo) foi para Carlos Rodríguez, profesor e secretario do CENP-Escola de Turismo da Coruña.
A gala concluíu cunha mensaxe común: o turismo da provincia vive un momento de consolidación, diversidade e proxección, sustentado tanto polo compromiso institucional como polo labor das empresas e profesionais que forman parte dun modelo turístico cada vez máis sostible, innovador e conectado co territorio.