A Deputación da Coruña achega máis de 120.000 euros para manter a casa de acollida e dous pisos para vítimas de violencia de xénero na cidade
A Deputación da Coruña e o Concello da Coruña formalizaron un convenio de colaboración para cofinanciar o mantemento da casa de acollida e dous pisos de inclusión e tránsito á vida autónoma dirixidos a mulleres vítimas de violencia de xénero na cidade. O acordo, rubricado na sede provincial polo presidente da Deputación, Valentín González Formoso, e a alcaldesa, Inés Rey, conta tamén co aval da deputada de Política Social, Mar García Vidal.
Segundo explicou a institución provincial, a achega da Deputación supera os 120.000 euros e supón o 24 % do custo anual de funcionamento destes recursos, integrados na Rede Galega de Acollemento. O servizo ofrece atención integral ás mulleres e ás súas fillas e fillos, garantindo un espazo seguro e estable, con acompañamento social, xurídico e psicolóxico.
O apoio económico permitirá afrontar gastos de persoal e de funcionamento, así como a compra de produtos alimentarios e farmacéuticos, roupa e axudas ao transporte, entre outros conceptos. Formoso salientou que a Deputación financia na actualidade as casas de acollida de Ferrol, Culleredo e A Coruña, que suman 48 prazas: 26 na Coruña (15 na casa e 11 nos pisos), 15 en Ferrol e 7 en Culleredo. 'A rede provincial de casas de acollida é esencial para protexer un colectivo especialmente vulnerable e para abrir novas oportunidades a quen atravesa momentos moi difíciles. Como administración, debemos garantir todos os recursos para que poidan reconstruír a súa vida con dignidade', afirmou.
Pola súa banda, Inés Rey subliñou a necesidade de manter a unidade institucional e social fronte á violencia machista: 'É imprescindible soster unha posición común da cidade contra esta eiva, manter fóra do noso consenso básico o negacionismo e trazar liñas hixiénicas fronte ao machismo organizado', dixo, lembrando os oito minutos de silencio gardados no último pleno municipal en memoria das oito mulleres asasinadas en España no último mes.