A Deputación da Coruña achega 40.000 euros para os cursos da UIMP en Galicia en 2025
A Deputación da Coruña reforza a súa aposta pola educación e a cultura cun novo convenio de colaboración coa Universidade Internacional Menéndez Pelayo (UIMP), mediante o cal destinará 40.000 euros para cofinanciar a programación formativa da sede galega durante o ano 2025. A deputada de Cultura, Natividad González, e a representante da UIMP, María Jesús Lorenzo, formalizaron o acordo.
A achega provincial, incluída no Plan Estratéxico de Subvencións 2025-2027, cubrirá o 57,55 % dun orzamento total de 69.500 euros e permitirá facer fronte a gastos como honorarios de profesorado, desprazamentos, aloxamento, medios técnicos e difusión das actividades.
“A través deste convenio reforzamos o compromiso da Deputación co fomento da educación e a cultura na provincia, mantendo unha colaboración estable desde hai anos e que achega formación de máxima calidade aos galegos e galegas”, destacou González.
Máis de 15 cursos en diferentes ámbitos
A programación para 2025 inclúe máis de 15 propostas formativas que abranguen unha ampla diversidade de disciplinas: medicina, psicoloxía, historia, cinema, matemáticas, enoloxía, arqueoloxía, literatura ou biodiversidade, entre outras.
Entre os cursos previstos destacan:
- Actualización en asma bronquial, dirixido por Luis Domínguez Juncal (maio)
- O viño como cultura: patrimonio, turismo e xénero, por Cristina Alcalá (maio)
- Divulgación da ciencia, a cargo de Moisés Canle, catedrático da UDC (xuño-xullo)
- Curso especializado para a avaliación e intervención en violencia de xénero (xullo)
- Santa María – Música en tempos de Alfonso X El Sabio (agosto)
- Memoria mergullada: arqueoloxía, patrimonio e turismo baixo o mar (setembro)
As actividades desenvolveranse entre o 1 de xaneiro e o 31 de decembro de 2025 en diferentes sedes da provincia, como A Coruña, Santiago de Compostela, Ribeira e o Pazo de Mariñán.
Unha colaboración que vén de lonxe
A relación entre a Deputación da Coruña e a UIMP remóntase ao convenio fundacional asinado o 10 de xullo de 1982. Desde entón, a institución provincial vén apoiando economicamente e de forma estable as actividades docentes e culturais da universidade no territorio galego.