A Deputación celebra a II Xornada sobre a fenda de xénero no deporte
A Deputación da Coruña organiza o vindeiro 6 de marzo a segunda edición da Xornada sobre a fenda de xénero no deporte, un encontro que ten como obxectivo analizar e debater as desigualdades de xénero neste ámbito. A iniciativa enmárcase nas actividades conmemorativas do 8M, Día Internacional da Muller, e reunirá a destacadas figuras do deporte da provincia para abordar os retos e propostas que permitan avanzar na igualdade de oportunidades entre mulleres e homes.
O evento contará cunha mesa redonda moderada polo xornalista deportivo Alfonso Hermida, que centrará a conversa en diversos aspectos da fenda de xénero no deporte. A xornada busca promover un espazo de reflexión e intercambio de ideas, poñendo o foco nas experiencias persoais e profesionais das persoas participantes.
Entre os nomes destacados que intervirán atópanse a campioa olímpica de vela Sofía Toro, a campioa de España de natación adaptada Almudena Quereda, a campioa de España de halterofilia Irene Martínez e o adestrador do equipo feminino do Hockey Club Coruña Stanis García. Todas e todos compartirán a súa visión e análise sobre os desafíos actuais e os pasos necesarios para acadar unha verdadeira igualdade no deporte.
Ao longo da xornada, tamén se abordará a importancia das políticas públicas e accións concretas para reducir as desigualdades de xénero, poñendo de relevo a necesidade de impulsar medidas que favorezan a visibilización e o apoio ao deporte feminino.
Con esta iniciativa, a Deputación da Coruña reafirma o seu compromiso coa loita pola igualdade e coa eliminación das barreiras que aínda persisten en determinados sectores da sociedade, especialmente no ámbito deportivo.