A Deputación aproba o Plan de Conservación de Vías Provinciais
O pleno da Deputación da Coruña aprobou por unanimidade a primeira fase do Plan de Conservación de Vías Provinciais, que en 2025 contará cun orzamento de 11.383.203 euros, o que supón un incremento do 3,5 % respecto ao ano pasado.
O plan contempla a execución de obras de mantemento, reparación do firme e pavimentación nos máis de 2.000 quilómetros de estradas que conforman a rede viaria provincial. Todas estas actuacións están destinadas a mellorar as condicións e aumentar a seguridade viaria nas vías da provincia, segundo explicou o presidente da Deputación, Valentín González Formoso.
A maior parte dos investimentos destinaranse á renovación de firmes e capas de rodaxe, ademais da mellora da sinalización vertical e horizontal. Pola súa banda, a apertura e limpeza de cunetas, a instalación de defensas viais e as obras de drenaxe representarán arredor do 15 % do orzamento total.
Ademais do Plan de Conservación, o servizo de Vías e Obras da Deputación conta cun plan de reparacións urxentes e outro destinado exclusivamente á roza e limpeza das marxes das estradas provinciais, que sumará un investimento adicional de 3,8 millóns de euros en 2025. Esta partida orzamentaria permitirá a limpeza periódica das marxes de todas as estradas, mellorando a visibilidade da circulación, evitando a propagación de incendios e facilitando a drenaxe das augas pluviais.
Os programas de conservación, reparacións urxentes e roza das estradas provinciais suporán este ano un investimento superior aos 7.200 euros por quilómetro. A deputada responsable da área de Vías e Obras, Mónica Rodríguez, subliñou o incremento continuo deste plan, destacando que "os traballos de conservación da ampla rede de estradas da Deputación para mantela nas mellores condicións é tan importante como a construción de novas infraestruturas para a seguridade viaria".