A Deputación aporta 16.000 euros para unha nova carretilla eléctrica na Confraría de Pescadores da Coruña
A Deputación da Coruña financiou a adquisición dunha nova carretilla eléctrica para a Confraría de Pescadores da Coruña a través dunha subvención de 16.000 euros. A deputada de Mar e Medio Rural, Cristina Capelán, visitou esta mañá a entidade para coñecer de primeira man o equipamento e a súa utilidade no día a día do porto.
Segundo explicaron os responsables da confraría, a nova maquinaria permitirá axilizar e facer máis seguras as tarefas de carga e descarga, transporte e apilamento de capturas, aparellos e materiais. O uso estenderase tanto ao interior das instalacións como ao exterior, na Dársena de Oza, co obxectivo de reducir tempos e mellorar a organización do traballo.
Capelán subliñou que este investimento supón unha mellora directa das condicións laborais ao incrementar a seguridade e contribuír a baixar custos operativos, ao tempo que repercute na eficiencia da actividade. A deputada puxo en valor o apoio provincial ás confrarías de pescadores e mariscadores, cunha liña de axudas específica dotada con 800.000 euros para impulsar a modernización e a produtividade do sector, ademais de facilitar a contratación de persoal.
A Confraría de Pescadores da Coruña foi beneficiaria tamén doutras subvencións da Deputación nos anos 2024 e 2025, destinadas a manter os postos de traballo do persoal administrativo. Trátase, segundo a institución provincial, dun respaldo orientado a favorecer a estabilidade laboral e garantir o bo funcionamento destas organizacións, consideradas pezas relevantes do tecido produtivo da provincia.