A Deputación agarda a autorización da Xunta para ampliar a seguridade viaria en San Paio
A Deputación da Coruña avanza no proceso para ampliar e mellorar a seguridade viaria na estrada DP-0810, en San Paio, no Concello de Bergondo, e agora está á espera da autorización da Xunta de Galicia para acometer unha actuación que considera imprescindible e urxente.
O xoves 27 de marzo tivo lugar unha reunión na sede administrativa da Xunta de Galicia na Coruña, onde os técnicos do departamento provincial de Vías e Obras presentaron aos técnicos da Dirección Xeral de Patrimonio un proxecto que garante a seguridade viaria na estrada de San Paio e respecta a catalogación de Villa Julia.
A Deputación confía en que o informe de Patrimonio, que agora debe decidir sobre a autorización da proposta, sexa favorable, xa que a ampliación da estrada é unha medida absolutamente necesaria para eliminar un punto negro onde xa se produciron accidentes mortais.
Desde a administración provincial esperan que, nesta ocasión, a Xunta de Galicia dea luz verde definitiva á actuación. O primeiro paso sería a realización das expropiacións necesarias, seguido pola execución das obras de ampliación da estrada, unha intervención fundamental para evitar que se sigan producindo vítimas mortais neste tramo viario.