A cúpula do novo multiusos de Bastiagueiro queda instalada tras unha operación inédita en Oleiros
A cúpula do novo multiusos de Bastiagueiro xa está colocada despois dunha operación de izado que se prolongou durante arredor de 8 horas. Un guindastre de alta potencia elevou de forma gradual unha estrutura de 750 toneladas e 41,5 metros de diámetro, que se está a anclar á base xa executada, composta por grandes planos de formigón e zonas acristaladas.
O arquitecto do proxecto, Fernando Martínez, explicou que desde o inicio se procurou unha boa integración visual do edificio na contorna, cun volume en forma de pirámide que vai reducindo a súa altura para facilitar as vistas cara ao bosque posterior. Tamén destacou que se trata dun recinto no que, cando o espectáculo o permita, será posible ver a vexetación exterior desde o interior, algo pouco habitual en instalacións deste tipo, que adoitan ser máis pechadas.
O alcalde de Oleiros, Ángel García Seoane, definiu o multiusos como unha infraestrutura chamada a acoller usos moi variados. Ademais de espectáculos culturais, o edificio está deseñado para albergar competicións deportivas, congresos, feiras e reunións, grazas ás súas dotacións na planta baixa e ás gradas fixas e retráctiles que permitirán adaptar o espazo. O rexedor lembrou que unha infraestrutura destas características xa se propuxera hai máis de 20 anos, pero daquela non chegou a executarse e o proxecto inicial quedara suspendido.
A plataforma colocada en Bastiagueiro ocupa unha superficie de 1.450 metros cadrados e ten un perímetro de 135 metros. Segundo recolle a memoria técnica, a cuberta resultante será plana e opaca, cun pequeno lucernario na parte central. Co seu potencial de máis de 4.000 asentos e a posibilidade de adaptar o aforo, o novo recinto facilitará a programación de espectáculos, eventos deportivos e citas profesionais de diferente formato no concello de Oleiros.