A coruñesa Belém Tajes gaña o Premio Narf 2025
A coruñesa Belém Tajes proclamouse vencedora do Premio Fran Pérez 'Narf' 2025. O certame, organizado pola Deputación da Coruña, premiou o seu risco creativo, a calidade dos arranxos e a capacidade para tender pontes entre a tradición galega e a música latinoamericana. O galardón principal está dotado con 4.000 euros e inclúe varias actuacións en festivais galegos. Marián acadou o segundo posto, con 2.000 euros, e Vimbio situouse en terceira posición, cun premio de 1.500 euros.
Cantante e compositora da Coruña, Tajes formou parte de proxectos como Vudú, Aliboria ou Luar na Lubre. En novembro de 2024 publicou o seu primeiro álbum de longa duración, 'Amar o mar', no que mestura a tradición galega con sonoridades latinoamericanas e pinceladas de pop e electrónica. O tribunal definiu a proposta como 'singular e con carácter propio', destacando unhas letras coidadas e unha instrumentación de personalidade marcada.
A final reuniu actuacións de quince minutos por cada banda finalista e contou, durante a deliberación, coa participación como convidadas de Caamaño&Ameixeiras. A velada estivo conducida polo xornalista Luís Pardo e incluíu a intervención do artista visual Iván Torres.
O xurado estivo presidido por Natividade González, deputada de Cultura da Deputación da Coruña, e integrado por Daniel Salgado, Ugia Pedreira, Alberto Busto, Noa Díaz e Tomi Legido, coa secretaría de Manuela Muñiz Souto. As finalistas foron escollidas entre unha trintena de propostas nesta décimo sétima edición dun premio que a Deputación da Coruña impulsa para apoiar a creación musical do país e manter viva a memoria e a obra de Fran Pérez 'Narf'. No palmarés do certame figuran nomes como Mounqup, Bala ou Familia Caamagno.