Infraestructuras

As actuacións incluirán a ampliación das beirarrúas, melloras na accesibilidade e a instalación de novo mobiliario urbano

O Goberno local, encabezado por Inés Rey, presentou o proxecto de reurbanización da rúa Paio Gómez, unha actuación que comezará nos próximos meses para seguir avanzando na mellora da contorna da praza de Lugo. Co obxectivo de priorizar o uso peonil e mellorar a accesibilidade, a intervención eliminará un dos carrís de circulación en superficie, mantendo operativo o carril subterráneo que conecta co túnel da praza de Lugo, esencial para a carga e descarga no mercado municipal.

Melloras na accesibilidade e na estética urbana

A intervención contempla a ampliación das beirarrúas no lado dos números impares, onde tamén se instalará un parterre con árbores, novo mobiliario urbano e unha rede renovada de recollida de augas pluviais. Ademais, os pasos peonís situados nos accesos á praza de Pontevedra e á praza de Lugo serán elevados para facilitar o tránsito seguro e cómodo das persoas viandantes, adaptando o pavimento ao mesmo nivel que as beirarrúas.

O novo deseño urbano buscará harmonizar a estética da rúa coas intervencións xa realizadas nas veciñas rúas Compostela e Picavia, empregando lousas de granito gris como substitución das baldosas actuais, deterioradas polo paso do tempo. “Esta continuidade estética reforza a identidade do Ensanche como un espazo moderno, accesible e funcional”, indicou a concelleira de Infraestruturas e Mobilidade, Noemí Díaz.

Impacto no comercio e na mobilidade

O proxecto forma parte dun plan máis amplo de transformación urbana na contorna da praza de Lugo, unha zona cunha elevada afluencia diaria debido ao seu carácter comercial. A remodelación de Paio Gómez dará continuidade ás actuacións previas en Compostela, Picavia e Betanzos, que priorizaron aos peóns ampliando espazos públicos e mellorando a accesibilidade.

“Queremos dar resposta ás necesidades de mobilidade e accesibilidade detectadas nesta rúa, que é un importante nexo peonil entre a praza de Lugo e a praza de Pontevedra. Ademais, preservaremos a funcionalidade para o mercado municipal, garantindo que a carga e descarga poidan realizarse con normalidade”, afirmou a alcaldesa, Inés Rey.

A reurbanización da rúa incluirá tamén a mellora do cruzamento coa praza de Lugo e Fonseca, ampliando a superficie do paso peonil para atender aos fluxos de mobilidade habituais nesta intersección clave do Ensanche.