A Coruña supera os 484.000 afiliados á Seguridade Social e consolida a creación de emprego
A provincia da Coruña continúa a mellorar os seus datos laborais. Segundo o balance publicado da Seguridade Social correspondente a xullo, a provincia alcanza xa os 484.098 afiliados, tras sumar 3.686 novas altas no último mes, o que supón un incremento do 0,77 % respecto de xuño.
Desde a entrada en vigor da reforma laboral a finais de 2021, A Coruña incorporou máis de 49.000 persoas ao mercado laboral, reforzando un panorama caracterizado por unha maior estabilidade contractual, o crecemento do emprego xuvenil e o aumento da participación feminina. Tamén destaca a boa evolución do traballo autónomo, que supera actualmente os 84.000 afiliados, mentres que o Réxime Xeral suma 395.033.
A evolución interanual mantén a mesma liña positiva, cun aumento do 0,77 % respecto ao ano pasado. A subdelegada do Goberno, María Rivas, subliñou que “a estabilidade e a calidade do emprego son factores clave para fixar poboación e avanzar cara a un mercado laboral máis moderno e sostible”. A nivel galego, a comunidade supera xa os 1.113.000 afiliados, con máis de 20.000 novas altas no último ano.