A Coruña será oficialmente sede do Mundial de Fútbol 2030
A Coruña foi designada oficialmente como unha das once sedes españolas do Mundial de Fútbol 2030, segundo anunciou este mércores, 11 de decembro, a FIFA nun congreso celebrado en Las Rozas. Representantes da cidade, como o concelleiro de Cultura e Turismo, Gonzalo Castro, e o de Deportes, Manuel Vázquez, asistiron ao evento organizado pola Real Federación Española de Fútbol.
A alcaldesa da Coruña, Inés Rey, destacou que este logro marca “un fito histórico para Galicia” e representa unha oportunidade única para posicionar a cidade a nivel mundial. O proxecto de Riazor, segundo explicou, non só adecuará o estadio para unha cita deportiva de primeiro nivel, senón que tamén será unha palanca para a transformación urbana, consolidando A Coruña como referencia no noroeste peninsular.
A candidatura, que cumpre cos estándares da FIFA, contará con catro concellos próximos —Ferrol, Betanzos, Ordes e Cerceda— como centros de adestramento, ademais dos tres aeródromos galegos como infraestruturas clave. “Este Mundial terá un impacto positivo para toda Galicia, tanto a nivel económico como cultural”, subliñou a alcaldesa.
O concelleiro Gonzalo Castro tamén resaltou que o Mundial 2030 transcende o deportivo: “Será unha oportunidade para que Galicia acolla actividades e eventos relacionados co torneo, situando a nosa comunidade no foco internacional”. Ademais, a renovación de Riazor permitirá a celebración de competicións como a Champions League e outros eventos culturais e corporativos, consolidando A Coruña como unha referencia do norte de España.