A Coruña será cidade piloto para achegar a Administración á poboación xitana
A cidade da Coruña formará parte dun programa piloto estatal que busca facilitar o acceso da poboación xitana en situación de maior vulnerabilidade aos trámites administrativos. A iniciativa, impulsada polo Ministerio de Política Territorial e Memoria Democrática en colaboración coa Fundación Secretariado Gitano (FSG), foi abordada esta semana nunha reunión entre a subdelegada do Goberno, María Rivas, e representantes da FSG en Galicia e na cidade.
Durante o encontro, Rivas reuniuse con Eva Vera, directora autonómica da FSG, e Maite Serra, coordinadora local da entidade, para avanzar na implantación deste protocolo que busca eliminar as barreiras no acceso aos dereitos básicos. O proxecto desenvolverase tamén noutras sete cidades españolas como Granada, Murcia, Valladolid ou Gijón, e sitúa a Coruña como referente no compromiso coa inclusión.
A escolla da Coruña como cidade piloto para desenvolver esta iniciativa é un recoñecemento ao compromiso desta provincia coa inclusión e a igualdade, destacou a subdelegada, quen tamén insistiu en que “a colaboración entre institucións é esencial para garantir que ningunha persoa quede atrás no acceso aos seus dereitos”.
O protocolo establecerá dúas liñas principais de actuación: por unha banda, habilitaranse espazos presenciais da Administración nas sedes da Fundación Secretariado Gitano para facilitar trámites como a obtención do certificado dixital; por outra, crearase un canal directo de comunicación entre os profesionais da FSG e o persoal da Administración Xeral do Estado, co fin de axilizar a atención e o acompañamento.
A medida insírese no marco do proxecto estatal “A Administración preto de ti”, lanzado en 2022 para achegar os servizos da AXE á cidadanía de concellos sen oficinas estatais. Trátase, en palabras do propio Executivo, de avanzar cara a unha Administración máis próxima, humana e sensible coas realidades sociais máis complexas.
Con este paso, A Coruña súmase á aposta por unha xestión pública centrada nas persoas, orientada á cohesión social, á igualdade de oportunidades e á loita contra a exclusión.