A Coruña saca a licitación 21 postos baleiros nos mercados de Monte Alto e San Agustín
O Concello da Coruña reabre o proceso para cubrir postos sen actividade en dous dos seus mercados municipais. A convocatoria inclúe 10 espazos no mercado de Monte Alto, reaberto o pasado 10 de decembro tras o traslado dende o mercado provisional, e 11 no mercado de San Agustín, que segue gañando atractivo pola renovación do contorno e pola programación de actividades no piso superior.
A licitación contempla tanto postos pensados para usos habituais (carnicería, froitería ou peixaría) como outros abertos a propostas das persoas solicitantes, co obxectivo de combinar a oferta máis tradicional con iniciativas novas e ampliar a clientela destes equipamentos de proximidade.
As concesións outorgaranse por un período inicial de 15 anos, con posibilidade de prorrogar 10 máis. As ofertas deberán presentarse a través da Plataforma de Contratación do Estado entre os días 15 e 26 de xaneiro. Dende o goberno local subliñan que a medida encaixa na estratexia de revitalización da rede de mercados municipais e no impulso ao comercio de barrio.