A Coruña prepárase para unha nova edición do festival Mar de Mares
A cidade da Coruña volverá acoller a partir do 6 de xuño unha nova edición do festival Mar de Mares, un evento que, tras 12 anos de traxectoria e co apoio continuado do Concello, consolidouse como unha cita de referencia no noroeste peninsular para promover a sensibilización sobre o coidado do mar e da costa desde unha perspectiva educativa, lúdica e social.
A concelleira de Medio Ambiente, Yoya Neira, presentou o programa desta edición, que inclúe máis de 20 actividades gratuítas abertas á cidadanía. Durante a súa intervención, Neira destacou o compromiso da entidade organizadora, Redes de Sal, por manter vivo no tempo un proxecto “esencial para unha cidade na que o mar forma parte da súa identidade económica e cultural”, e agradeceu o seu labor complementario ás accións da súa área na protección do litoral.
O festival ofrece unha ampla e diversa programación que permitirá aos asistentes participar en encontros con científicos, oceanógrafos, artistas, emprendedores do ámbito mariño, cociñeiros e activistas. Tamén se organizarán actividades ao aire libre e visitas a espazos habitualmente pechados ao público, como a Torre de Salvamento Marítimo, que abrirá por primeira vez as súas portas.
Entre as propostas máis destacadas figuran o Mercado Mar de Mares, que se celebrará os días 6 e 7 de xuño no mercado de San Agustín, unha limpeza de fondos mariños prevista para o 15 de xuño e unha charla coa bióloga e divulgadora científica Odile Rodríguez de la Fuente, que terá lugar na Domus tamén o 6 de xuño.
A programación inclúe ademais exposicións, conferencias, actividades de avistamento de aves mariñas, monólogos e sesións de cinema, configurando unha oferta que busca achegar o coñecemento e a defensa do medio mariño a todos os públicos. O Concello destaca que o festival forma parte da ampla axenda ambiental impulsada polo Goberno de Inés Rey, reforzando a súa aposta pola sustentabilidade e a educación ambiental na cidade.