A Coruña lembra a expedición de Loaysa cunha exposición no 500 aniversario da súa partida
A cidade da Coruña abriu ao público a exposición ‘Da Coruña ás Molucas’, unha mostra impulsada polo Instituto José Cornide de Estudios Coruñeses que conmemora o 500 aniversario da expedición dirixida por García Jofré de Loaysa ás illas das especias. O acto contou coa participación do concelleiro de Cultura e Turismo, Gonzalo Castro, quen destacou a relevancia histórica desta efeméride para a cidade.
“Desde o Goberno de Inés Rey quixemos poñer en valor o papel destacado dunha expedición que contribuíu a potenciar o desenvolvemento comercial e portuario da cidade”, afirmou Castro durante a inauguración.
A exposición recupera a memoria dunha das maiores expedicións que saíron da Coruña rumbo ao arquipélago das Molucas, o 24 de xullo de 1525, no marco das ambicións comerciais e marítimas do Imperio español. A través de paneis informativos, a mostra afonda nos antecedentes, feitos e consecuencias desta aventura oceánica, así como no papel clave que xogou a cidade tras recibir da man de Carlos V a concesión da Casa de Contratación.
A través deste recurso institucional, A Coruña converteuse nun punto de saída estratéxico para expedicións que procuraban establecer relacións comerciais directas coas illas Molucas, coñecidas polos seus prezados produtos: as especias.
A proposta expositiva forma parte do compromiso do Concello coruñés por recuperar e divulgar capítulos significativos da súa historia marítima e comercial, cun enfoque didáctico e divulgativo que permite coñecer mellor o papel da cidade nos grandes movementos transoceánicos da época.