A Coruña inaugura 'Mujeres, leyendas del deporte', un tributo ás pioneiras e estrelas do deporte feminino
O Concello da Coruña abriu este mércores, 12 de novembro de 2025, a exposición 'Mujeres, leyendas del deporte', unha homenaxe ás grandes protagonistas do deporte feminino a nivel nacional e internacional. O acto de inauguración estivo presidido pola rexedora, Inés Rey, acompañada polo concelleiro de Deportes, Manuel Vázquez, e por representantes do tecido deportivo, educativo e cultural da cidade.
A mostra poderá visitarse ata o 23 de novembro na Sala de Exposicións Salvador de Madariaga (rúa Durán Loriga) e reúne máis de 70 pezas orixinais, entre equipamentos, obxectos icónicos e materiais históricos, pertencentes a deportistas como Carolina Marín, Mireia Belmonte, Lydia Valentín, Ruth Beitia, Alexia Putellas, Nadia Comaneci ou Simone Biles. O percorrido inclúe, ademais, un espazo específico dedicado a referentes locais como Sofía Toro, Julia Benedetti e Elena Roca.
Durante a súa intervención, Inés Rey subliñou que a mostra 'é tamén un exercicio de memoria e de xustiza coas deportistas que abriron camiño, mulleres que demostraron que o talento, a paixón e a disciplina non teñen xénero'. A alcaldesa destacou o papel transformador do deporte e o compromiso da cidade coa igualdade real no ámbito deportivo. Engadiu que a exposición 'axuda a poñer rostro ás mulleres que fixeron historia no deporte, pero tamén serve para inspirar ás nenas e mozas que, moitas veces, carecen de referentes visibles. A igualdade tamén se constrúe ofrecendo exemplos reais de éxito feminino'.
A iniciativa enmárcase na programación municipal de novembro con motivo do 25N (Día Internacional da Eliminación da Violencia contra a Muller) e poderá visitarse de balde no horario habitual da sala.