A Coruña expande os Mercados da Economía Sostible a máis barrios na súa terceira edición
O Concello da Coruña continúa a súa aposta pola sustentabilidade coa terceira edición consecutiva dos Mercados da Economía Sostible, un programa que levará, entre maio de 2025 e abril de 2026, a filosofía da compra responsable a todos os distritos da cidade. A iniciativa, consolidada desde o seu lanzamento en 2023, suma xa máis de 38.000 visitantes e converteuse nun referente da economía circular e do comercio de proximidade.
A nova tempada combinará dúas modalidades de mercado: os mercados ecolóxicos, centrados en produtos con certificacións sostibles, e os mercados sostibles, baseados nos principios das 4R (Reducir, Reutilizar, Reciclar e Recuperar). Os ecolóxicos manteranse no Campo da Leña, mentres que os sostibles percorrerán diversos barrios, ampliando a súa presenza a novas localizacións como San Vicente de Elviña, a Praza das Conchiñas e a Praza da Tabacalera.
A concelleira de Emprego, Comercio e Mercados, Diana Cabanas, subliñou a importancia desta iniciativa como “ferramenta estratéxica para apoiar o tecido comercial local e fomentar hábitos de consumo máis conscientes entre a cidadanía”. Engadiu que “coa ampliación da programación e a chegada a novos barrios, reforzamos o compromiso de levar a sustentabilidade a todos os recunchos da cidade”.
A programación prevista para os meses de maio a decembro de 2025 inclúe máis dunha vintena de citas repartidas por toda a cidade, consolidando esta proposta como un motor de dinamización urbana e sensibilización ambiental. A entrada a todos os mercados será libre e gratuíta.
Co impulso deste programa, o Goberno municipal que lidera Inés Rey reafirma o seu compromiso coa transición ecolóxica, a revitalización dos barrios e a construción dunha cidade máis verde, concienciada e participativa.