Infraestructuras

As balizas, con luz verde e vermella sobre o pavimento da beirarrúa xunto ao paso peonil, buscan mellorar a visibilidade da sinalización nun punto con moito tránsito escolar e onde se detectaron distraccións polo uso do móbil

O Concello da Coruña prepara un novo paso para reforzar a seguridade viaria no Ensanche: a posible instalación de balizas semafóricas LED no chan no cruzamento entre as rúas Modesta Goicouría e Rubine. Trátase dun sistema pioneiro na cidade que reproduciría, sobre o propio pavimento, as indicacións dos semáforos xa existentes na intersección.

Segundo detallou o Goberno local, estes dispositivos colocaríanse na beirarrúa lindeira ao paso peonil, sobre a zona de baldosas podotáctiles que guía o acceso. As bandas LED acenderíanse en verde cando o semáforo permita cruzar e en vermello cando o prohiba, co obxectivo de facer máis visible a advertencia no campo visual inmediato das persoas viandantes.

A concelleira de Infraestruturas e Mobilidade, Noemí Díaz, explicou que a medida se avalía pola proximidade de varios centros educativos e polo incremento das necesidades de sinalización tras a recente modificación de Modesta Goicouría, que pasou a funcionar en dobre sentido, con circulación tanto cara ao paseo marítimo como cara á praza de Pontevedra.

Díaz encadrou a iniciativa dentro do compromiso municipal cos camiños escolares e cos itinerarios habituais do alumnado. Neste caso, o informe técnico que sustenta o proxecto sinala que se detectou un número significativo de persoas que cruzan mentres consultan o teléfono móbil, unha circunstancia que pode aumentar o risco de incidente. A implantación das balizas LED pretendería, precisamente, reducir esa exposición mellorando a percepción da sinalización.

Por agora, o Concello mantén o proxecto en fase de estudo e análise técnica, á espera de concretar os seguintes pasos para a súa execución.