A Coruña e a súa área suman catro proxectos de vivenda protexida con axuda da Xunta en 2025
A Xunta de Galicia concedeu este ano oito axudas a cooperativas e promotoras para a construción de vivenda protexida, das que catro se localizan na provincia da Coruña, cun investimento autonómico de 3,8 millóns de euros. Estes proxectos permitirán levantar máis de 380 vivendas destinadas á venda e ao alugueiro, segundo explicou a conselleira de Vivenda e Planificación de Infraestruturas, María M. Allegue.
Na área coruñesa, as achegas beneficiarán cooperativas e promotoras da cidade e doutros concellos próximos, como Culleredo, que impulsarán novos edificios residenciais en solo urbano consolidado. Unha das axudas tamén se dirixe a unha promotora da cidade da Coruña para a construción de vivenda en réxime de alugueiro, cun investimento de preto de 575.000 euros.
Allegue destacou que a Xunta triplicará o orzamento destas axudas en 2026, ata preto de 15 millóns de euros, co obxectivo de seguir incentivando a construción de vivenda accesible. Ademais, a Consellería prepara cambios normativos para permitir levantar vivenda protexida en solos dotacionais en desuso e aumentar a edificabilidade en solo urbanizable, sempre que o 60% das novas promocións se destine a este tipo de vivenda.