A Coruña derruba o ‘tapón urbanístico’ de San Diego e Petín para gañar espazos públicos entre A Gaiteira e A Cubela
O Concello da Coruña iniciou onte os traballos para derrubar un pequeno galpón situado no cruzamento das rúas San Diego e Petín, no percorrido entre A Gaiteira e A Cubela. A actuación, segundo explicou a alcaldesa, Inés Rey, permitirá recuperar o espazo que ocupaba a construción e eliminar un ‘tapón urbanístico’ que impedía unificar unha área axardinada nesta parte do barrio.
O derrubo encaixa, segundo o Goberno municipal, nos compromisos adquiridos coa veciñanza e dá continuidade ás actuacións iniciadas a mediados de 2021, cando o Concello habilitou no ámbito un pequeno parque biosaudable. Daquela, a ampliación do espazo verde quedou condicionada pola existencia de parcelas privadas fragmentadas, o que obrigaba a ir incorporando superficies mediante adquisicións ou expropiacións.
A rexedora detallou que estes expedientes se foron resolvendo de forma progresiva, a través de acordos coas distintas persoas propietarias, e puxo o foco na complexidade de tramitar actuacións en ámbitos con múltiples titulares. No caso concreto do galpón, a súa compra por parte do Concello supuxo no seu momento un desembolso de 240.000 euros.
Unha vez completada a demolición, a retirada dos escombros e o nivelado do terreo, o Concello prevé iniciar os traballos de adecuación da nova superficie gañada para o uso público. Entre as opcións que se están a valorar figura o axardinamento do espazo, co obxectivo de mellorar a continuidade das zonas verdes existentes. ‘Tentamos dar resposta a unha das principais demandas das veciñas e veciños nesta parte do barrio’, sinalou Inés Rey.