A Coruña convértese na capital da innovación en diabetes co congreso 'Diabetes Evolution 2025'
A Coruña acollerá esta fin de semana o congreso ‘Diabetes Evolution 2025’, unha cita centrada na actualización terapéutica e nos avances tecnolóxicos da diabetes —especialmente a infantil e xuvenil— que se celebrará o sábado 18 no Hotel Attica21. O encontro, organizado polo Servizo de Endocrinoloxía do CHUAC e pola Fundación de Endocrinoloxía e Nutrición Galega, reunirá profesionais sanitarios e persoas con diabetes para debullar o estado actual da abordaxe, compartir innovación e reforzar a concienciación social.
Como antesala, mañá venres 17 ás 18.30 no propio hotel haberá charlas divulgativas abertas ao público que percorrerán as enfermidades metabólicas desde a perspectiva clínica, tecnolóxica e sociolóxica, a cargo de profesorado e investigadores da Universidade da Coruña.
A organización lembra que o 14% da poboación española convive coa diabetes —preto de seis millóns de persoas— e que a diabetes tipo 2 supón entre o 90% e o 95% dos casos, mentres a tipo 1 tamén medra. Un bo control glucémico é determinante para a calidade de vida e para evitar complicacións graves como nefropatía, retinopatía, deterioro cognitivo ou enfermidade cardiovascular. Xunto con dieta equilibrada e exercicio regular, o congreso porá o foco nas novas tecnoloxías: sensores de monitorización continua da glucosa, bombas de insulina e sistemas integrados que conectan sensor e bomba, pasos clave cara ao chamado páncreas artificial e cada vez máis presentes tamén na diabetes tipo 2.
Alén da tecnoloxía, ‘Diabetes Evolution 2025’ insistirá na educación terapéutica, na prevención e na promoción da saúde, elementos esenciais para reducir o impacto da enfermidade e favorecer a autonomía das persoas afectadas. En Galicia, a diabetes infantil e xuvenil afecta arredor de 5 de cada 1.000 nenos, polo que a divulgación e o acompañamento ás familias serán tamén eixos da xornada.