A Coruña contará co seu primeiro proxecto de vivenda colaborativa no barrio de Xuxán
A cidade da Coruña dará un paso pioneiro no ámbito da vivenda colaborativa coa adxudicación do dereito de superficie da parcela Z-26A, situada no barrio de Xuxán, á cooperativa Outra Forma de Vivenda.
Esta entidade sen ánimo de lucro será a encargada de promover un edificio que acollerá entre 33 e 38 vivendas baixo o modelo de cesión de uso, un sistema que garante o acceso a vivendas dignas e a prezo reducido mediante un mecanismo non especulativo, no que a vivenda se concibe como un ben de uso e non como un produto financeiro.
O proxecto foi deseñado pola cooperativa de arquitectura e urbanismo Hábitat Social e destaca por ser o primeiro que aplica este modelo sobre unha parcela de titularidade municipal, cedida por un período de 50 anos, tras o cal o inmoble pasará a formar parte do patrimonio público. Outra Forma de Vivenda, creada en 2015, está formada por un grupo interxeracional e heteroxéneo de persoas que traballan para difundir modelos habitacionais máis inclusivos e accesibles.
O edificio, de cinco plantas, foi concibido a través dun proceso participativo no que se buscaron solucións que compatibilicen privacidade e espazos comunitarios. Incluirá corredores exteriores de acceso ás vivendas, un patio central e zonas comúns como cociña, comedor, lavandería ou hortas na cuberta, ademais de locais comerciais.
Seguindo criterios de sustentabilidade, o deseño aposta pola eficiencia enerxética e a accesibilidade universal, empregando madeira contralaminada (CLT) para a estrutura principal, o que reducirá os prazos de construción. Incorporará tamén sistemas de xeotermia, ventilación mecánica con recuperador de calor, paneis solares fotovoltaicos e reaproveitamento de augas pluviais. As vivendas estarán adaptadas a diferentes necesidades, podendo modificar a súa configuración co tempo grazas a elementos flexibles como tabiques lixeiros e espazos polivalentes.
Desde a cooperativa explican que este proxecto supón unha alternativa colectiva e autoxestionada fronte á emerxencia habitacional, afastándose do valor patrimonial da propiedade privada para poñer no centro o uso da vivenda. Tras a adxudicación da parcela, Outra Forma de Vivenda abre agora un novo período para incorporar novas socias interesadas en formar parte da iniciativa, ás que ofrece información e a posibilidade de resolver dúbidas sobre o modelo.