A Coruña consolídase como capital mundial da marcha atlética cunha nova edición dos Cantóns
A cidade da Coruña foi este sábado o epicentro internacional da marcha atlética coa celebración da 38ª edición do Gran Premio Internacional de Marcha Cantóns – Trofeo Sergio Vázquez, considerado a proba máis importante do mundo nesta disciplina. O evento, integrado na máxima categoría ouro da 'World Walking Tour 2025', contou coa participación de atletas de 24 países dos cinco continentes, incluíndo os actuais campións olímpicos.
Na proba principal de 20 quilómetros, o xaponés Toshikazu Yamanishi impúxose cun tempo de 01:18:15, seguido polo tamén xaponés Matasora Kawano e o mexicano Ricardo Ortiz, que completaron o podio masculino. Na categoría feminina, a andaluza María Pérez, cun tempo de 01:27:22, proclamouse vencedora por diante da mexicana Alegna González e da chinesa Li Peng.
Na distancia de 10 quilómetros, os triunfos foron para o chinés Congshan Bi na proba masculina e para a colombiana Ruby Dayana Segura García na feminina.
A proba coruñesa mantense como un referente mundial ao formar parte da elite da marcha atlética xunto a cidades como Taicang (China), Dudince (Eslovaquia), Río Maior (Portugal), Varsovia (Polonia), Podebrady (República Checa) e Madrid.
O concelleiro de Deportes, Manuel Vázquez, participou na entrega de trofeos e destacou a aposta do executivo local polos grandes eventos deportivos: 'Desde o Goberno de Inés Rey mantemos a nosa aposta polos grandes eventos deportivos, como este Gran Premio de Marcha, referente absoluto que este ano volveu a gañar o distintivo de mellor proba do mundo'.