A Coruña celebra os 20 anos da Lei do Matrimonio Igualitario cun acto institucional

Un dos momentos máis emotivos foi o recoñecemento ás primeiras parellas LGTBI que casaron na Coruña

O Concello da Coruña organizou no Salón de Sesións do Palacio Municipal un acto institucional para conmemorar o 20 aniversario da aprobación da Lei do Matrimonio Igualitario, que contou coa presenza das principais institucións provinciais, membros da corporación municipal, entidades LGTBI, sindicatos e colectivos sociais da cidade.

A alcaldesa, Inés Rey, presidiu o evento e destacou que “non é só unha celebración. É unha declaración de principios”. No seu discurso alertou contra os retrocesos promovidos pola extrema dereita e avisou que “a igualdade está ameazada e non podemos mirar cara outro lado”. Reivindicou tamén o Concello como “unha institución garante de dereitos” afirmando que “aquí non pechamos portas. Abrímolas ao amor, á diversidade e ao respecto.”

Rey recordou ademais a figuras clave da loita LGTBI en A Coruña, como Elisa e Marcela, protagonistas do primeiro matrimonio entre dúas mulleres en España, e o activista Tomás Fábregas, recoñecido pola súa defensa dos dereitos das persoas con VIH e da comunidade LGTBI. “A Coruña soubo estar sempre á altura. E non temos intención de deixar de estalo”, afirmou.

No acto, a concelleira de Benestar Social, Nereida Canosa, leu o encabezamento da lei que fixo posible o matrimonio igualitario. A continuación, Noemí Díaz, concelleira que puido casar grazas á nova normativa, compartiu unha reflexión sobre a importancia de que a súa historia persoal simbolice unha conquista colectiva.

Tamén interviñeron Carmen Marón, ex deputada que votou a favor da lei no Congreso, e Mar Barcón, ex concelleira que celebrou as primeiras vodas igualitarias na cidade, quen puxeron en valor o papel das administracións locais na defensa dos dereitos cidadáns.

Un dos momentos máis emotivos foi o recoñecemento ás primeiras parellas LGTBI que se casaron en A Coruña: José Luis Quintela e Marcos Soto, primeiros en María Pita, e Isaac González e José Ramón Veiras, primeiros no Salón de Sesións. A alcaldesa subliñou que “representades moito máis que un vínculo persoal. Representades unha conquista colectiva.”

O acto rematou coa actuación do Coro Cores, que interpretou cancións como “El amor”, “A mi manera” e “Lay all your love on me”.

Na súa clausura, Inés Rey enviou unha mensaxe clara ante o avance dos discursos de odio: “Vivimos tempos perigosos. Non todos os discursos son inocentes. E non todas as opinións son inofensivas.”