A Coruña celebra o 25 aniversario da Liga do Dépor cunha fin de semana chea de emocións
A Coruña prepárase para unha fin de semana moi especial co gallo do 25 aniversario da histórica Liga conquistada polo Real Club Deportivo en 2000. A programación central da iniciativa O mellor que me pasou na vida, impulsada pola plataforma homónima co apoio do Concello da Coruña, reunirá afección, xogadores e artistas para celebrar un fito sen precedentes no fútbol galego.
O prato forte da celebración chega este sábado 24 na explanada do Palacio dos Deportes de Riazor, onde desde as 12.00 horas terá lugar unha gran festa aberta a toda a cidade. A xornada incluirá propostas para todas as idades: polbeira, food trucks, xogos tradicionais, torneo de futbolín, monólogos e a presenza de material exclusivo para os máis afeccionados. Un dos grandes atractivos será a oportunidade de fotografarse coa réplica da Copa de Liga, cedida polo club para a ocasión.
O humor e a paixón branquiazul fusionaranse co espectáculo Dépor Locura de Roi da Costa, mentres que o broche de ouro chegará pola noite coa actuación de La Mosca Tsé-Tsé ás 22.00 horas. O grupo fará soar de novo o himno espontáneo daquel título, devolvendo á cidade a emoción vivida hai 25 anos. Xunto a eles, completarán o cartel artistas profundamente vinculados ao deportivismo: Orquesta Bravú Xangai, La Banda del Camión, Mar de Fondo, Kike Varela e la Yaya DJ.
A cidade da Coruña vístese de branquiazul para revivir unha das páxinas máis brillantes da súa historia deportiva, cunha homenaxe chea de lembranzas, música e orgullo compartido.