A Coruña acollerá diferentes accións de sensibilización polo Día Mundial do Párkinson
Con motivo do Día Mundial do Párkinson, que se celebra este xoves 11 de abril, a Asociación Párkinson Galicia-Coruña súmase á campaña nacional ‘Non deas nada por sentado’, promovida pola Federación Española de Párkinson. Esta iniciativa busca sensibilizar á poboación e romper cos estigmas que aínda pesan sobre as persoas que conviven con esta enfermidade neurodexenerativa.
Actualmente, máis de 160.000 persoas viven con párkinson en España, e no mundo a cifra supera os 8,5 millóns. Adoita asociarse o párkinson unicamente ao tremor ou á vellez, mais esta percepción reducida non reflicte a diversidade de síntomas nin as múltiples realidades das persoas afectadas. A campaña chama a mirar con máis atención e empatía, e a comprender que moitos dos efectos da enfermidade non son visibles a simple vista.
Nesta liña, a Asociación Párkinson Galicia-Coruña desenvolverá diversas accións de sensibilización na cidade. Durante a xornada do 11 de abril instalaranse oito mesas informativas en centros de saúde e hospitais da Coruña, onde se ofrecerá orientación profesional e material divulgativo sobre a enfermidade. Ademais, ás once da mañá terá lugar un acto institucional na Praza de María Pita, no que se lerá o manifesto do movemento asociativo. Neste acto participarán representantes públicos, familias e profesionais do ámbito sanitario.
A programación continuará o día 25 de abril coa celebración das VI Xornadas de Párkinson: Novos Tempos na EP, que terán lugar na Fundación Barrié. O encontro reunirá profesionais da saúde, persoas afectadas, familiares e investigadores para abordar os últimos avances no tratamento e comprensión da enfermidade desde unha visión integral. A asistencia será gratuíta, pero debido ao aforo limitado será necesaria a inscrición previa, que poderá realizarse chamando ao número 981 241 100 ou enviando un correo electrónico a info@parkinsongaliciacoruna.org.
O calendario de actividades pecharase o sábado 10 de maio coa cuarta edición da Carreira e Andaina Solidaria polo Párkinson, que terá lugar ás 10.30 horas no paseo marítimo de O Burgo. Este evento busca combinar deporte, visibilización e apoio ás persoas que conviven coa enfermidade, ao tempo que promove hábitos de vida saudables. As inscricións estarán abertas ata o 30 de abril a través da plataforma dixital habilitada pola organización.
Desde a Asociación fan un chamamento á cidadanía para informarse, derrubar prexuízos e apoiar as persoas con párkinson, co obxectivo de construír unha sociedade máis xusta, comprensiva e accesible para todas as persoas.