A Coruña acolle Mundos Dixitais, o congreso sobre animación, efectos visuais e intelixencia artificial
Unha nova edición de Mundos Dixitais, o Congreso Internacional de Animación, Efectos Visuais e Novos Media, volverá converter A Coruña na capital da innovación visual entre o 3 e o 5 de xullo. O evento, que terá lugar no Palexco, ofrecerá tres xornadas intensas cun programa que reunirá preto de 70 poñentes nacionais e internacionais.
A presentación desenvolveuse no plató virtual Coruña Estudio Inmersivo da Cidade das TIC, onde Castro destacou a traxectoria dun congreso que xa acumula máis de vinte anos de historia. Nesta nova edición, Mundos Dixitais afondará en áreas tan diversas como a animación, os efectos visuais, a produción virtual, os videoxogos, os novos medios e, especialmente, a intelixencia artificial.
'De cuestións como o desenvolvemento da IA falábase ata hai pouco en clave de futuro. E non, xa é o presente e na Coruña, grazas ao esforzo do Goberno de Inés Rey para conseguir a AESIA e, ademais, o pulo que estamos a dar á Cidade das TIC en Pedralonga, temos unha posición privilexiada para reunir aos mellores expertos e profesionais deste eido. Mundos Dixitais é un exemplo disto', afirmou o concelleiro Gonzalo Castro.
Entre os nomes destacados da edición de 2025 estará o equipo de efectos visuais e produción virtual de Netflix, que participará coincidindo co décimo aniversario da compañía en España. Ademais, o congreso acollerá a presentación oficial de AI Assemble, unha nova asociación que agrupa a profesionais, empresas e entidades vencelladas coa intelixencia artificial, nacida precisamente no marco de Mundos Dixitais.
Outro dos momentos sinalados será a entrega do Premio Especial ao director Tim Miller, coñecido polas súas producións Deadpool e Terminator: Dark Fate, e que será homenaxeado pola súa achega ao mundo dos efectos visuais e a narrativa dixital.
A programación tamén incluirá unha feira de emprego, xa consolidada como un dos espazos máis atractivos do evento, que conecta talento novo e empresas do sector audiovisual e tecnolóxico. No acto de presentación tamén participaron o director da AGADIC, Jacobo Sutil; o presidente da Deputación da Coruña, Valentín González Formoso; e o director e fundador do congreso, Manuel Meijide. Toda a información detallada e o programa completo poden consultarse na web oficial do congreso Mundos Dixitais.