A Coruña acolle esta fin de semana o Galego Infantil e o Festival Alevín de salvamento e socorrismo
A Coruña converterase esta fin de semana nun dos epicentros do salvamento e socorrismo galego coa celebración de dúas citas autonómicas que reunirán a máis de 200 deportistas de clubs de toda Galicia. O sábado 21 de febreiro disputarase o Campionato Galego Infantil de Piscina na Piscina Municipal de Riazor e, ao día seguinte, domingo 22, o Club do Mar acollerá o Festival Alevín de Piscina.
O campionato infantil contará con 115 participantes nados en 2014 e 2015, pertencentes a nove clubs. A competición desenvolverase en dúas sesións, de 10.30 a 13.00 horas e de 16.30 a 19.30 horas, con probas como os 100 metros con obstáculos, o remolque de maniquí, relevos e combinadas.
A proba está considerada a cita autonómica máis importante en piscina nesta categoría e servirá tamén como preparación de cara ao Campionato Nacional, previsto para marzo en Bétera. Un dos datos máis salientables é que a participación feminina supera o 50% das inscricións, unha mostra do crecente protagonismo das mozas nesta disciplina.
O domingo será a quenda do Festival Alevín, que reunirá no Club do Mar a 85 deportistas menores de 10 anos, tamén de nove clubs galegos. O evento celebrarase nunha única sesión de tarde, de 16.00 a 18.30 horas, e está concibido como unha xornada de iniciación e primeiro contacto co formato competitivo.
O concelleiro de Deportes, Manuel Vázquez, destacou que 'é unha satisfacción que A Coruña sexa sede de campionatos autonómicos que fomentan o deporte base e visibilizan disciplinas como o salvamento e socorrismo', e lembrou o compoñente formativo dunha modalidade que combina técnica, esforzo e preparación constante para salvar vidas. Desde o Concello subliñan que a organización destas dúas citas contribúe tamén a dinamizar as instalacións municipais e a proxectar a cidade como referente na acollida de competicións autonómicas.