A Coruña abre o prazo do Bono Taxi 2026 para persoas con discapacidade e mobilidade reducida
O Concello da Coruña abriu a convocatoria do Bono Taxi 2026, unha axuda individual dirixida a persoas con discapacidade que lles impide usar o transporte público colectivo, co obxectivo de facilitar os seus desprazamentos en taxi. A tramitación pode facerse por vía telemática ou presencial e está activa do 15 de outubro ao 14 de novembro de 2025.
Entre os requisitos, as persoas solicitantes deben estar empadroadas na Coruña, ter recoñecida a discapacidade con impacto grave na mobilidade, non figurar como titulares dun vehículo segundo a DXT e non superar o 210% do IPREM (base 2026). O procedemento non ten custo e resólveo a Concellería de Benestar Social nun prazo máximo de seis meses, con silencio administrativo desestimatorio.
O orzamento global ascende a 150.000 euros, que se repartirán a partes iguais entre as persoas admitidas, cun límite de 1.000 euros por beneficiario. Os bonos, en papel e de importes de 0,50 €, 1,00 € e 3,00 €, poderán empregarse ata o 31 de decembro de 2026.