A Coruña abre o prazo de inscrición para a XVI Baixada Popular de Cross San Pedro de Visma
O Concello da Coruña abre o prazo de inscrición para a XVI Baixada Popular de Cross San Pedro de Visma, que se celebrará o próximo 11 de maio. Esta proba, que se converte na terceira do circuíto de carreiras populares Coruña Corre, chega á súa 12ª edición, consolidándose como unha das citas máis esperadas no calendario deportivo galego.
A inscrición pode realizarse a través da páxina web oficial do circuíto, ata o domingo 4 de maio, data límite tanto para apuntarse á Baixada Popular como ao circuíto completo. O concelleiro de Deportes, Manuel Vázquez, destacou o compromiso do Goberno de Inés Rey coas carreiras populares, un evento que enche os barrios da cidade de miles de corredores e que se desenvolve ao longo de sete probas.
A carreira dará comezo o domingo 11 de maio, ás 10.00 horas, cun percorrido de 6.490 metros para os participantes na categoría absoluta. Ás 11.15 horas será a quenda das categorías inferiores, que disputarán un total de seis carreiras. O punto de saída e meta estará situado na rúa San Pedro de Visma, á altura do cruzamento coa rúa Aguillón, xusto ao lado do centro cívico municipal.
O percorrido discorrerá pola estrada de Bens, pasando polo parque da zona, onde se desenvolverá a maior parte da proba, antes de regresar polo mesmo camiño. Na meta, os participantes poderán gozar de servizo de avituallamento sólido e líquido.
Para participar, os corredores deberán retirar os seus dorsais no Centro Comercial Cuatro Caminos o sábado 10 de maio entre as 11.00 e as 20.30 horas ou o domingo 11 no centro cívico de San Pedro de Visma, ata unha hora antes do inicio das carreiras. As persoas que xa teñan o dorsal do circuíto Coruña Corre non necesitarán retirar un novo, pero deberán confirmar a súa participación na proba.
Ademais, o evento contará cun servizo de gardarroupa, dispoñible de 9.30 a 11.15 horas no centro cívico, e dun servizo de duchas no polideportivo municipal de Labañou, de 10.30 a 13.00 horas. A entrega de premios terá lugar ás 11.00 horas, no podio situado fronte á zona de meta.
Inscricións ao circuíto e á proba individual
Os interesados en participar no circuíto Coruña Corre poderán inscribirse nunha única modalidade que lles dará dereito a participar nas seis probas restantes e a optar aos premios do circuíto. A inscrición ao circuíto pecharase tamén o domingo 4 de maio, e todas as persoas inscritas deberán confirmar a súa participación proba a proba. Para aqueles que só desexen participar na XVI Baixada Popular de Cross San Pedro de Visma, tamén existe a opción de inscrición independente á proba.