A Coruña abre o concurso internacional para deseñar o Máster Plan da súa fachada marítima
A transformación do bordo marítimo coruñés entra nunha nova fase decisiva coa posta en marcha do concurso internacional para a redacción do Máster Plan da Coruña Marítima. A Autoridade Portuaria da Coruña acaba de publicar as bases e os pregos técnicos no Diario Oficial da Unión Europea e na Plataforma de Contratación do Estado, abrindo un prazo de 45 días hábiles —ata o 1 de agosto— para que equipos profesionais de todo o mundo presenten as súas candidaturas.
Este ambicioso proceso de planificación urbanística abrangue todo o porto interior da cidade, desde o dique de abrigo ata a dársena de Oza e a estación de mercadorías de San Diego. A actuación, cun orzamento total de 3.015.000 euros, busca definir un novo modelo de cidade-portuaria que priorice a calidade urbana, os usos públicos, a integración coa cidade e o respecto polo medio ambiente.
A licitación estrutúrase en dúas fases. Nunha primeira, seleccionaranse ata cinco equipos entre os que se presenten, valorando criterios como a experiencia en proxectos similares, a calidade dos seus currículos e os premios acadados. As propostas deberán contar cun equipo multidisciplinar con profesionais en áreas como urbanismo, arquitectura, paisaxismo, portos, ferrocarrís e mobilidade.
Cada unha das cinco propostas seleccionadas recibirá unha prima de 80.000 euros e disporá de cinco meses para desenvolver o seu proxecto. A selección final do equipo gañador está prevista para xuño de 2026, e este terá ata o verán de 2027 para entregar o Máster Plan completo e a documentación complementaria: informes ambientais, modificacións do Plan Xeral, requisitos para un edificio singular emblemático, unha maqueta física, unha recreación 3D e un espazo de realidade virtual.
O proceso será acompañado por un comité de expertos que avaliará aspectos técnicos, ambientais, económicos e funcionais das propostas. Ademais, garantirase a transparencia e a participación pública mediante unha exposición do proxecto definitivo, co obxectivo de achegalo á cidadanía.
O financiamento será compartido entre as seis administracións que integran a Comisión Coruña Marítima: o Concello da Coruña, a Xunta de Galicia, o Ministerio de Transportes e Mobilidade Sostible, ADIF, Portos do Estado e a propia Autoridade Portuaria. O proxecto deberá respectar tamén as Bases Estratéxicas e os 14 Acordos Estratéxicos aprobados pola comisión, que inclúen medidas para impulsar o desenvolvemento económico, reforzar a actividade portuaria, mellorar as conexións coa área metropolitana e crear máis espazos verdes e equipamentos públicos.
Pero máis alá da técnica, o concurso pon o foco na identidade. “A solución debe ser coruñesa”, recollen expresamente as bases, “que entenda a escala, o espírito, a tradición e a historia da Coruña”. Non se trata de importar modelos foráneos, senón de propoñer un proxecto contemporáneo, internacional e, ao tempo, profundamente arraigado na esencia da cidade.
Co obxectivo de que a veciñanza non só coñeza o futuro da súa fachada marítima, senón que o sinta como propio, a dimensión cidadá do plan terá un papel central. Como conclúe o documento: “O cidadán ten que ser consciente de que se atopa na Coruña e non en calquera outro espazo sen personalidade”.