A Coruña abre o 2 de marzo a inscrición para os cursos municipais de iniciación ao golf do segundo trimestre
O Concello da Coruña porá en marcha o vindeiro 2 de marzo, ás 08.00 horas, o prazo para solicitar praza nos cursos municipais de iniciación ao golf correspondentes ao segundo trimestre de 2026. A actividade desenvolverase entre abril e xuño no Campo Municipal de Golf Torre de Hércules.
O período de inscrición prolongarase ata o 8 de marzo ás 23.59 horas. Nesta convocatoria ofértanse 136 prazas, organizadas en grupos de oito persoas e distribuídas por idades: infantil (de 6 a 11 anos), xuvenil (de 12 a 16) e adultos (a partir de 17 anos).
O 10 de marzo publicaranse as listaxes provisionais de persoas solicitantes e abrirase un prazo para emendar posibles erros ata o día 12. A relación definitiva darase a coñecer o 13 de marzo e, se a demanda supera as prazas dispoñibles, realizarase un sorteo público o 16 de marzo ás 09.00 horas. As listaxes de adxudicación publicaranse o 18 de marzo.
A matrícula formalizarase no propio Campo Municipal de Golf Torre de Hércules entre o 20 e o 26 de marzo. Os días 27, 28, 29 e 30 reservaranse para a xestión da listaxe de agarda.
As taxas, de acordo coa ordenanza fiscal vixente, serán de 49,67 euros para adultos e de 29,81 euros para infantil e xuvenil. Os cursos comezarán na primeira quincena de abril, en función da frecuencia escollida (luns-xoves, martes-venres ou sábados-domingos), e prolongaranse ata mediados de xuño.
A inscrición deberá facerse exclusivamente a través do formulario habilitado na web municipal coruna.gal/deportes, onde tamén se publicará a información do proceso. Co programa, o Goberno municipal que encabeza Inés Rey mantén a súa aposta por fomentar a práctica deportiva e os hábitos saudables facilitando o acceso a instalacións municipais.