A Coruña abre a inscrición nos Campamentos de Nadal dos centros cívicos con máis de 500 prazas
O Concello da Coruña vén de abrir este mércores o prazo de preinscrición nos Campamentos de Nadal dos Centros Cívicos Municipais, unha programación de lecer educativo para nenos e nenas que se desenvolverá a partir do 22 de decembro e que ofrece máis de 500 prazas. En total serán 35 grupos de 15 participantes, o que supón 525 prazas dispoñibles nos distintos barrios da cidade.
A concelleira de Benestar Social, Participación e Igualdade, Nereida Canosa, subliñou que o Goberno de Inés Rey busca con esta iniciativa 'ofrecer alternativas de ocio de calidade para as crianzas durante o período non lectivo, ao tempo que se facilita a conciliación das familias nestas datas'.
As actividades terán lugar nos 22 centros cívicos municipais en horario xeral de 10.00 a 14.00 horas, con posibilidade de horario ampliado de 9.00 a 14.30 horas. O prezo da matrícula é de 26 euros, que se eleva a 32 euros na modalidade ampliada. O prazo de preinscrición remata este venres 28 de novembro. As listaxes provisionais publicaranse o 4 de decembro e as definitivas, o 12 de decembro.
Ao longo dos Campamentos de Nadal as nenas e nenos participarán en obradoiros creativos, actividades lúdicas e xogos cooperativos adaptados ás diferentes idades, co obxectivo de fomentar a convivencia, o traballo en equipo, a participación activa e o goce dun tempo de lecer educativo e saudable durante as vacacións de inverno.
A oferta complétase coas 144 prazas dos campamentos deportivos de Nadal organizados polo Concello, que xa foron adxudicadas, polo que a programación municipal de Nadal para infancia supera as 600 prazas entre ambas modalidades.
En resposta ás demandas das entidades veciñais e debido ao peche temporal por obras do Centro Cívico de Labañou, o Concello acordou, en colaboración coa Universidade da Coruña, trasladar os campamentos deste barrio ao espazo da Normal. Con esta medida garántese a continuidade da actividade na contorna, evitando desprazamentos fóra do barrio e facilitando a participación das familias de Labañou.