A comisión de festas de San Roque de Larín renuncia á pólvora por risco extremo de incendios
A Comisión de Festas de San Roque de Larín anunciou que este ano non se fará uso de fogos artificiais nin ningún tipo de pólvora durante os tres días de celebracións, que se celebrarán os días 29, 30 e 31 de agosto. Esta medida responde ao risco extremo de incendios no municipio e segue as recomendacións da Xunta de Galicia e do Concello de Arteixo.
O día 29 de agosto celebrarase a verbena co grupo Os Sátélites, o 30 subirán ao escenario Paris de Noia, e o 31 será a quenda de Unión e Forza. Ademais das verbenas, mantéñense todas as demais actividades programadas, garantindo que os veciños poidan gozar das festas con normalidade e seguridade.
A Comisión de Festas subliña que a medida tamén é un xesto de solidariedade coas zonas afectadas polos lumes, procurando a protección da veciñanza. Ao mesmo tempo, fan un chamamento á participación de todos, lembrando que o verdadeiro espírito de San Roque reside na convivencia, a alegría e a colaboración comunitaria.