A cidade da Coruña recupera a totalidade dos servizos especiais de recollida de lixo
O Concello da Coruña anunciou hoxe a recuperación completa dos servizos especiais de recollida de residuos a partir de hoxe. Tras a finalización da folga de recollida e a declaración de emerxencia sanitaria, todos os servizos volven operar con normalidade para satisfacer as necesidades de hostaleiros, comerciantes e usuarios en xeral.
A recollida porta a porta de cartón e plástico de embalaxes, que se realiza en días alternos polas mañás nos polígonos industriais, está de volta. Ademais, desde hoxe tamén se retoma a recollida de voluminosos e residuos de aparellos electrónicos (RAES), que pode ser solicitada chamando ao teléfono 010. Se a chamada se efectúa antes das 13.00 horas, a recollida pode realizarse o mesmo día. Os puntos limpos municipais dos Rosales e Eirís continuaron funcionando durante todo o conflicto co seu horario habitual.
O servizo de recollida porta a porta para establecementos de hostalaría tamén volve estar en funcionamento. Durante a tempada de verán, os bares e restaurantes adscritos a este servizo contan cunha dobre quenda diaria de recollida de residuos orgánicos e inorgánicos. A recollida de envases de vidro realízase polas mañás, de 10.00 a 13.00 horas, os luns, mércores, venres e domingos, e a de papel e cartón no mesmo horario os martes, xoves e sábados.
A concelleira de Medio Ambiente, Yoya Neira, destacou que “calquera información ou incidencia sobre a recuperación dos servizos pode ser atendida no teléfono 010”. Neira tamén quixo agradecer “tanto aos usuarios dos servizos especiais como á cidadanía en xeral a súa comprensión e colaboración durante as últimas semanas”.