A cidadanía coruñesa poderá gozar dun novo mercadiño artístico e artesanal
Por petición das praceiras, chega unha nova proposta ao mercado da praza de Lugo, que se celebrará os días 2, 3, 9 e 10 de maio. Durante estas xornadas, a primeira e segunda planta do mercado acollerán un mercadiño artístico e artesanal protagonizado por mulleres creadoras galegas, en colaboración co colectivo Salgadiñas. Así, o Concello da Coruña continúa co seu impulso á transformación dos mercados municipais en espazos abertos á cultura, á creatividade e ao comercio local.
O mercadiño estará aberto ao público en horario de 10.00 a 14.30 horas e ofrecerá unha ampla mostra de produtos artesanais, como cerámica, ilustracións, xoiería, téxtil, velas e produtos naturais elaborados á man. A cita, que busca promover a creatividade galega, contará tamén con obradoiros e actividades de dinamización para todos os públicos, facendo do mercado un espazo dinámico e interactivo.
A concelleira de Mercados, Diana Cabanas, subliñou a importancia desta iniciativa, destacando que "a praza de Lugo converterase nun escaparate do talento feminino e nun punto de encontro coa creatividade da nosa contorna". Cabanas destacou tamén o compromiso do Concello por darlles nova vida aos mercados tradicionais e por apoiar o pequeno comercio, o emprendemento e o consumo consciente.
Este evento non é unha novidade: o Goberno municipal puxo en marcha esta proposta por primeira vez no ano 2023, como unha maneira de potenciar os espazos municipais e ofrecer oportunidades reais ás creadoras locais. O obxectivo é consolidar un modelo de mercado máis dinámico, sostible e conectado coa cidade, onde a cultura de proximidade e a igualdade sexan pezas chave.
A participación no mercadiño incluirá once marcas galegas, que representarán unha ampla diversidade creativa. Algúns dos proxectos que estarán presentes son Lunazul Velas, especializada en velas artesanais ecolóxicas con esencias naturais; Antonia Studio, un proxecto de deseño sostible que transforma materiais con novas vidas; Te Cielo Handmade, que ofrece bolsos e accesorios feitos á man con tecidos únicos; e Zen Tolas, cunha coidada selección de cerámica e bixutería artesanal.
Tamén estarán presentes El Taller Muy Secreto, recoñecida polas súas pezas téxtiles decorativas cargadas de fantasía; Laboratorio Vintage, que mestura moda vintage e creatividade urbana; Mónica Coto, artista plástica que traballa entre o collage, a pintura e a escultura; Pasamarela, marca de complementos e roupa feita á man con identidade atlántica; Bea C. Barros, ilustradora e creadora multidisciplinar; e Zeltia | Xoiería ao aire, que combina natureza e arte en xoias inspiradas no vento e no mar.
Este mercadiño reafirma o compromiso do Goberno de Inés Rey coa dinamización comercial dos barrios, coa cultura de proximidade e coa igualdade de xénero, creando espazos de cohesión e identidade urbana que, sen dúbida, contribuirán ao fortalecemento da cultura e do comercio local na cidade.