Eventos

A Casa da Cultura Pintor Lloréns acolle hoxe venres 2 de xaneiro ás 18.30 h o espectáculo ‘Non somos 5, somos 7’, con entrada de balde ata completar aforo

A programación cultural de Sada arrinca o ano cunha proposta pensada para gozar en familia e, ao tempo, achegar a lingua galega á cativada dun xeito lúdico. A Concellería de Cultura organiza hoxe venres 2 de xaneiro, ás 18.30 h, o concerto de Gramola Gominola na Casa da Cultura Pintor Lloréns, coa montaxe titulada ‘Non somos 5, somos 7’. A entrada será libre ata completar a capacidade.

O espectáculo parte dunha idea clara: reivindicar as sete vogais do galego como fío condutor dun xogo musical no que a rapazada tamén participa. A proposta mestura música en directo, rimas, creación, adiviñas e interacción co público, buscando que as nenas e nenos se fixen en cada vogal a través da diversión.

Dende o Concello destacan o carácter dinámico da actuación e o seu enfoque educativo, ao converter a escena nun espazo de aprendizaxe compartida, sen perder o ton festivo propio destas datas.