A Casa da Cultura de Sada abre o pano para 'Berenguela na gaiola'
Sada prepara unha nova cita coa escena para público familiar. O Auditorio da Casa da Cultura acollerá este sábado a representación de 'Berenguela na gaiola', unha montaxe impulsada por Galeatro e Xarope Tulú que chega ao municipio da man da programación cultural local. A proposta, recoñecida no 4º Certame Manuel María de Proxectos Teatrais, combina humor e emoción arredor dunha historia que pon o foco na liberdade, na imaxinación e na dignidade das persoas maiores.
A peza, escrita e dirixida por Paula Carballeira a partir do universo literario de Manuel María, sitúa a acción nunha residencia da terceira idade. Alí, Berenguela, Aurora e Tomás atopan no teatro unha vía para rebelarse contra os límites da realidade e recuperar o dereito a soñar. O espectáculo revisita 'Aventuras e desventuras dunha espiña de toxo chamada Berenguela' e constrúe unha historia pensada para emocionar e divertir a varias xeracións ao mesmo tempo.
No escenario estarán Alba Bermúdez, Atenea García e Tone Martínez, nunha produción que tamén conta coa colaboración do Centro Dramático Galego, da Fundación Manuel María e do FIOT. A función en Sada preséntase así como unha oportunidade para achegar ao público unha das propostas familiares galegas máis destacadas da tempada recente.