A Casa da Cultura de Ordes acollerá a segunda edición do Maratón Teatral
A Casa da Cultura de Ordes converterase este domingo, 1 de xuño, nun auténtico escenario de talento e paixón polo teatro, coa celebración do II Maratón Teatral Concello de Ordes, unha iniciativa promovida polas ANPAS dos colexios Castelao e Campomaior en colaboración co Concello.
A xornada dará comezo ás 12.00 horas co grupo local Abaixo o Telón de Ordes, que estreará a sesión matinal coa obra O Chirimbolo. Ás 13.00 horas tomará o relevo a Escola de Teatro APA As Mariñas, que presentará a peza O achado do castro.
Xa pola tarde, Abaixo o Telón regresará ao escenario con dobre función: ás 16.30 horas representarán Romeo e Xulieta, e ás 18.00 horas será a quenda de Mergullarse na auga.
O punto final a esta intensa xornada cultural porao a Escola Municipal de Teatro de Ordes, que subirá ao escenario cunha proposta cargada de maxia: Meigas Fóra.
Esta segunda edición do maratón consolídase como unha cita destacada na programación cultural do municipio, promovendo a creatividade, o traballo colectivo e o achegamento das artes escénicas á veciñanza de todas as idades.