A Carreira Popular de Arteixo celebra o seu 25 aniversario co circuíto clásico de sempre
Arteixo prepárase para vivir unha nova edición, e xa van 25, da súa emblemática Carreira Popular, que volverá encher as rúas de deporte e emoción o vindeiro 1 de maio. A proba absoluta manterá, un ano máis, o seu percorrido tradicional de 11,7 quilómetros, con saída ás 11.45 horas na contorna do Pazo dos Deportes. Un circuíto que se converteu nun clásico do atletismo popular galego, tanto pola súa esixencia como polo seu valor simbólico.
O trazado combina zonas rápidas con outras de maior dificultade, ofrecendo un reto atractivo tanto para atletas experimentados como para afeccionados que buscan superarse. A continuidade do mesmo percorrido edición tras edición permite aos corredores compararse co seu propio rendemento ao longo dos anos, reforzando o carácter competitivo e emocional da carreira.
Desde a implantación da cronometraxe electrónica no ano 2010, os tempos de referencia seguen a marcar o obxectivo a bater. Santiago López, cun impresionante rexistro de 37:43, ostenta o récord masculino, mentres que Barca Toba lidera a táboa feminina cun tempo de 45:15. Dúas marcas que continúan sendo fonte de inspiración para os participantes.
A cita deste 2025 chega con máis forza ca nunca, coincidindo co 25 aniversario da proba. Desde o Concello de Arteixo destacan que esta celebración manterá “a mesma paixón de sempre” e convidan á veciñanza e aos visitantes a formar parte dun evento que xa é patrimonio deportivo da comarca e do atletismo galego.