A Carreira Popular da Torre de Hércules e a Andaina Conmemorativa polo 8M suman máis de 3.500 inscritos
O Concello da Coruña informa de que o prazo de inscrición na Carreira Popular da Torre de Hércules e na Andaina Conmemorativa polo 8-M rematou con máis de 3.500 persoas inscritas, segundo o balance final realizado. As probas, que se celebrarán o sábado 15 de marzo, marcan o inicio da nova tempada do circuíto Coruña Corre.
O concelleiro de Deportes, Manuel Vázquez, destacou as boas cifras de inscrición rexistradas, que reflicten o interese pola práctica deportiva en A Coruña. "Un ano máis, A Coruña amosa que é unha cidade comprometida co deporte e Coruña Corre forma parte da programación anual coa que o Goberno de Inés Rey busca promover e achegar os hábitos de vida saudable a escala interxeracional", sinalou Vázquez.
As inscricións para a proba absoluta alcanzaron as 2.158 persoas, mentres que nas categorías inferiores houbo 896 participantes. Pola súa parte, na Andaina Conmemorativa polo 8-M inscribíronse 531 persoas, sumando un total de 3.585 participantes.
A recollida de dorsais terá lugar os días 14 e 15 de marzo na Cidade Deportiva da Torre-Arsenio Iglesias, onde tamén se ofrecerán servizos de duchas e vestiario para os corredores da categoría absoluta.