A cantante Gigi McFarlane actúa este venres na Coruña
Este venres 19 de abril, o museo de MEGA converterase nunha auténtica festa de soul, disco e música negra da man de Gigi McFarlane. Así, os concertos con maridaxe en formato íntimo regresan ao Museo de Estrela Galicia da man desta impactante e enérxica voz do soul, que aterra na Coruña en formato dúo con temas orixinais do seu disco Power Acoustic.
A cantante, famosa por interaccionar co público durante os seus directos, ofrecerá tamén en MEGA versións de grandes éxitos de artistas como Tracy Chapman, Michael Jackson ou Madonna. As últimas entradas para o evento están dispoñibles a través da web oficial do museo.
Nada en Londres, de nai jamaicana e pai alemán, Gigi McFarlane consolidouse como unha figura destacada no circuíto nacional de clubs e festivais dedicados ao soul e á música negra. Desde que se estableceu en Barcelona fai máis dunha década, a súa carreira artística como intérprete, compositora e guitarrista experimentou unha constante evolución, destacando especialmente pola forza e o impacto das súas actuacións en vivo.
No seu repertorio, Gigi combina clásicos do soul e grandes temas da música negra de todas as épocas con composicións propias que revelan cada vez máis a súa personalidade única. Con máis de 2000 concertos realizados en todo o mundo e a súa participación no programa de TVE Cover Night, Gigi demostrou a súa versatilidade e o seu talento no escenario. A súa habilidade para conectar co público e converter os seus shows en auténticas festas do ritmo posiciónana como unha figura en ascenso no seu campo. A artista (voz e guitarra) regresa agora en MEGA -onde xa revolucionou ao público fai cinco anos, con motivo da inauguración do museo- en formato dúo, xunto a Cristian Torres como responsable dos teclados e as frecuencias.