A cadete Rosalía Veiga levará o nome de Oza-Cesuras ao Campionato de España de seleccións autonómicas de balonmán
Oza-Cesuras terá representación no Campionato de España de Seleccións Autonómicas (CESA) de balonmán, que se disputará en Cataluña do 3 ao 8 de xaneiro. A veciña Rosalía Veiga Vázquez formará parte da Selección Galega Cadete Feminina, converténdose nunha das deportistas que defenderán as cores de Galicia nunha das citas máis importantes do calendario estatal de base.
Desde o Concello trasladaron unha mensaxe de apoio e parabéns á xogadora, destacando o mérito de acadar esta convocatoria e animándoa a desfrutar dunha experiencia que combina competición ao máis alto nivel e aprendizaxe nun contexto deportivo esixente.
Como antesala do campionato, o pasado 28 de decembro celebrouse en Silleda a presentación das Seleccións Galegas de Balonmán 2025, un acto no Recinto Feiral ao que asistiu a concelleira Pilar Rilo. A presencia institucional, sinalan desde o Concello, buscou tamén amosar respaldo á representación local e poñer en valor o traballo das deportistas e dos seus clubs na formación e na promoción do balonmán.