A Axencia de Lectura de Vilasantar organiza un obradoiro creativo para a rapazada
A Axencia de Lectura Municipal de Vilasantar organiza un obradoiro creativo dirixido á rapazada do Campus de Deporte e Ocio Álex Bergantiños, baixo o título “Crea, conta e ilumina! – arte tecnolóxico”. Esta actividade, que se desenvolverá o xoves 10 de xullo ás 11.00 horas, combina creatividade e tecnoloxía de forma divertida e didáctica.
Durante o obradoiro, coordinado por Robótica Creativa, os participantes confeccionarán figuras con LEDs mentres elaboran historias que lles permitan soñar e experimentar coa luz. Ademais de fomentar a imaxinación, os rapaces e rapazas aprenderán nocións básicas sobre electricidade dun xeito práctico e entretido.
A iniciativa forma parte da programación do Campus de Deporte e Ocio Álex Bergantiños e busca achegar a ciencia e a arte ás novas xeracións nun ambiente lúdico e innovador.