A arte urbana transforma o Pavillón Municipal de Sada coa arte de Mon Devane
O Pavillón Municipal de Sada vístese de arte coa intervención de Mon Devane, o coñecido muralista ourensán famoso polo seu estilo fotorrealista e monocromático. Esta actuación, promovida pola concellería de Deportes, marca un paso máis na transformación integral deste espazo deportivo.
Devane, cunha traxectoria recoñecida a nivel internacional, está a realizar unha obra inspirada no legado de Isaac Díaz Pardo, un intelectual galego cuxos valores e simboloxía se integrarán no mural. O obxectivo é converter o pavillón nun lugar onde o deporte e a cultura convivan, celebrando a tradición galega a través da arte urbana.
Esta iniciativa culmina a renovación do pavillón, que incluíu o pintado da pista, a modernización dos vestiarios, a instalación dunha nova iluminación LED máis eficiente e a actualización da sinaléctica e do marcador. Ademais, solucionáronse provisionalmente as filtracións na cuberta, cunha reforma completa prevista a curto prazo.
Con esta obra, Mon Devane súmase á lista de artistas urbanos que deixaron a súa pegada en Sada, como Lula Goce, Javier Bermúdez (JA), Doa Oa e Yoseba MP, convertendo o municipio nun referente de arte urbana en Galicia.